Rais wa Jamhuri ya Muungano wa Tanzania Dkt. John Pombe Magufuli akiwahutubia na wakazi wa Babati Mkoani Manyara waliomsimamisha sehemu mbalimbali wakati akitokea Dodoma kuelekea mjini Arusha kwa njia ya barabara leo Mei 6, 2016

Rais wa Jamhuri ya Muungano wa Tanzania Dkt. John Pombe Magufuli amewataka wafanyabiashara wote walioficha sukari katika maghala yao, kuanza kuisambaza mara moja, vinginevyo serikali itachukua hatua kali ikiwa ni pamoja na kuinyang'anya sukari hiyo na kuisambaza kwa wananchi bure.

Wabunge wameitaka Ofisi ya Bunge iwaondolee mara moja utaratibu wa kusaini kwa kutumia vidole mara mbili kwa siku kwa kuwa wao si wanafunzi.

Hoja hiyo iliwasilishwa kwa njia ya mwongozo na kuungwa mkono na wabunge wote isipokuwa mawaziri na Mbunge wa Konde, Khatib Said Haji (CUF) mjini Dodoma jana.

Daladala zinazofanya safari zake katikati ya jiji zimetakiwa  kuondoka   ifikapo MeiHayo yameelezwa leo na Msemaji wa Mradi wa Mabasi yaendayo kasi (Dart),  ambaye pia ni Mwenyekiti wa Chama cha Wamiliki wa Mabasi Mkoa wa Dar  es Salaam (Darcoboa), Sabri Mabrouk. Amelisema tayari wamiliki wote wa mabasi walishalipwa fidia ya kubadili njia.

Baada ya siku sita kufunikwa na vifusi vya jengo la makaazi ya orofa saba liliporomoka katika mtaa wa Huruma jijini Nairobi nchini Kenya, mwanamke mja mzito ameokolewa akiwa hai.

Maafisa wa uokoaji wanasema yuko hospitalini anakoendelea kupata matibabu pamoja na kwamba hakuumia hata kidogo.

Hali ya utulivu imeshuhudiwa leo katika mji wa Allepo nchini Syria baada ya Marekani na Urusi kufikia mwafaka wa kusitisha mapigano ambao yamekuwa yakiendelea kwa zaidi ya wiki mbili na kusababisha mamia ya watu kupoteza maisha.

Jeshi la Syria limesema litatii mkataba huo ambao unatarajiwa kushuhudiwa kwa siku mbili zijazo.

Tume ya uchaguzi nchini Kenya IEBC inasema haijiuzulu licha ya kuendelea kupata shinikizo kutoka kwa wanasiasa wa upinzani kuelekea uchaguzi Mkuu mwaka ujao.

Makamishena wa Tume hiyo wanasema, wao sio mafisadi na wala hawaegemei upande mmoja kama inavyodaiwa na muungano wa CORD.

Serikali ya Zimbabwe inapanga kuchapisha noti zake za kifedha zinazofanana na Dola ya Marekani kukabiliana na uhaba wa fedha nchini humo.

Gavana wa Benki Kuu nchini humo John Mangudya amesema mpango huo utaungwa mkono na Benki ya uingizaji na upokeaji kwa kima cha Dola za Marekani 200.

Serikali ya Uganda imepiga marufuku vyombo vya Habari nchini humo kupeperusha matangazo ya moja kwa moja maandamano ya upinzani yakiongozwa na Kizza Besigye kutoka chama cha FDC kuendelea kupinga ushindi wa rais Museveni mwezi Februari.

Hii inamaanisha kuwa vyombo vya Habari haviruhusiwi kuwahoji wanasiasa wa upinzani au kuonesha shughuli zao za kisiasa wakati huu rais Museveni akitarajiwa kuapishwa Alhamisi ijayo.

Siku moja baada ya Gavana wa zamani wa Jimbo la Katanga nchini Jamhuri ya Kidemokrasia ya Congo Moise Katumbi Chapwe kutangaza nia yake ya kuwania urais mwezi Novemba kupitia muungano wa vyma vya upinzani, serikali nchini humo imeamuru uchunguzi kufanyika dhidi ya mwanasiasa huyo kutumia mamluki kutoka Marekani kumlinda.

Hata hivyo, madai haya yamekanushwa na Katumbi ambaye amesema ni ya uongo na hawezi kutumia silaha kuingia madarakani.